سر يالقلم ننقض كـلام المحاميـن
لصـارت الدعـوه حمايـا حمانـا
نقض الحجج لابد له من براهيـن
ومعنـا شهـادة الوفـا لدعـانـا
ومن مدنا بالصاع نجزاه صاعيـن
واللـي ياعادينـا عليـه اعتدانـا
كان الحميدي(1) وازملاه متصافين
على الحكي فيما ما تقـدم حكانـا
تلحقـوا غـارات نـاسٍ قديميـن
واخطوا وحنا من خطاهم خطانـا
ودام الشريعه تاخذ العيـن بالعيـن
حنا ما تقضـي الشريعـه قضانـا
حنـا بميـزان المعانـي ثقيلـيـن
وعلـى مماشينـا بعيـدٍ مـدانـا
هيهات لو حولت عكس الموازيـن
قضا القضا فيما مضـى وانتهانـا
ياحرب لو حطيتم البيـت نصفيـن
ماهوب موصلكـم ليـا مستوانـا
انتـم رجـال بالمعـارك غثيثيـن
لكن ما تلحـق اخطاكـم اخطانـا
حنـا عتيبـه ملحقيـن المخلـيـن
بعنا بسـوق الطايـلات وشرانـا
قومٍ على صولات الايام ضاريـن
لو عضنا ناب الدهـر مـا قوانـا
يهابنا الطمـاع لـو قلبـه اذهيـن
نبطش محـلات الطمـع لاغزانـا
لنـا سلـوم غاليـات المثامـيـن
سلومنـا محـدن حملهـا سوانـا
في سلم لوماء الوجه عام وشهرين
وادخيلنـا مامـون داخـل حمانـا
ثلاثمايـة يـوم تــزداد ستـيـن
تنحـا المنايـا عنـه هيبـة لحانـا
ومن حده الموت الحمر والدياييـن
تخير الحصن الحصيـن ونصانـا
وبالحين نملى فارغات الموازيـن
جيب الصحون ومكرمات الصيانـا
للضيف والجيـران والمستحقيـن
إليا مـن وهـاب العطايـا عطانـا
ابيوتنـا للضيـف مثـل البساتيـن
يفرح به الملهـوف ليلـة ضوانـا
نجود بالماجـود بالعسـر والليـن
وضحك الحجاج وما حلا من نبانا
حنا على حفظ المواجيب حريصين
مانعطي الطرقـي قراطيـع مانـا
والجار له واجـب وحنـا وفييـن
ندعيه للكرمـه ولـو مـا دعانـا
جيرانا دايـم حشـام وعزيزيـن
وندرا شرفهم عن كـلام اسفهانـا
حنا بوجه الجـار دايـم جديديـن
يزيـد مـع زايـده اثنينـه وفانـا
وان جاء نهار المعمعه واللغا الشين
نبيع غـلاة الـروح دون اقصرانـا
وان راح نشـدق قفـاه بسكاكيـن
نحمي مجاله عقب عنـه انتحانـا
وخوينا لو هو من اللـي معاديـن
يأمن بنـا فـي كـل درب مشانـا
ليا عودة عشر اكثر النـاس ثنتيـن
وصاروا بغرات الخـوي عقربانـا
ولصرنا مع الخوي بدرب متخاوين
نرعى الحقوق ولانخـون خويانـا
ليست هناك تعليقات:
إرسال تعليق